【原】敬告家長：維持方言能力對囡肆大有好處（嘉定華亭話）

▲yuko醬 攝于石公山

隨著學堂普通話教學個強勢推行，現在交關家長儕不theh囡肆蜪話方言嘖，認為話方言會干擾囡肆對普通話個學習。遞個可能是一個誤區，最終不一定有能達到目的，反倒會削弱囡肆本來應該天生具有個能力。實際上，維持方言能力對囡肆大有好處垃許。挨下來，我就分不同個方面為大家解析。

一、  漢語學習方面

1．   對學習古漢語個好處

可能交關人儕認為自家個方言母語土透土透，不登大雅之堂，gah實不是寔恁個。各地個漢語方言儕是古漢語個繼承者，其中有交關古語。以我伲漢語第二大方言吳語為例，平常腳話著個交關言話儕包含著古漢語個成分，譬如：今朝、明朝、上晝、下晝、歸來、歸去、若然、若是、斫稻、斫麥、何上、何里、爛勚、烊勚、殟塞、??殺、鑊子、鑊?、蹄髈、??肉、新婦、?牙、疰車、疰夏、豪??、搛菜、閛門、埲塵、飯?、齾口、著衣裳、凈衣裳、?衣裳、撳牢定、囥物事、潷汁水、鐾刀布、??野貓、??苗頭、?長短、齆鼻頭、妗格格、冰冰瀴、渳渳醪酒、??脫一歇、隑垃門上、????不動、溚溚渧渧、繗繗補補……可以講是比比皆是，其中個一部分就有可能塱小學到大學個古文里碰著。

交關人儕有寔恁個感觸——讀書個辰光看見古文就頭大，遞種感覺從一定程度上講是因為現代漢語相對古代漢語來講發生著較大個變化，現代人對古漢語缺乏直觀個感受。畢竟，以北京言話為基礎個普通話，傳承著個古漢語是有限個，若然只以遞個基點去理解古漢語，局限性是顯而易見個。但若然佷對自家個方言母語原有一定個使用能力，佷對古漢語個理解就多著一個維度，因為垃不同個方言里保留個古漢語成分不盡相同，有個成分可能邋北方言話里已經不用嘖，但塱其他方言里還有保留。特別是幾大南方方言，雖然看上去theh普通話個基礎方言北方言話大不一樣，但可能保留著還要多個古漢語成分，遞個theh歷史上漢人大規模朝南方遷徙有關系。譬假講現代普通話稱為“鍋子”個物事，南方個吳語里有“鑊子”個叫法，再朝南個閩語里有“鼎”個稱呼，遞個gah實就是鑊子遞樣物事塱漢語不同歷史時期個不同名稱，個么可能對于閩語區個人來講，看見古文里個“鼎”就可能直觀個認識著是“鑊子”個意思，對于吳語區個人來講，看見古文里個“鑊”就曉得是“鑊子”，也就是普通話講個“鍋子”。

還有譬假講古漢語知識里常莊提著個“去”是“離開”個意思，佷若然單立足于普通話個說話可能蠻難理解，但垃佷個方言母語里遞種意思蠻有可能原舊保留垃許。譬方吳語嘉定言話離開個辰光可以話“我去嘖”，遞個“去”就是保留著古語“離開”個意思，因為垃語境里佷可能根本朆話人家聽佷到何上去，只是表示離開個意思。

還有譬假講古漢語里出現個“水上”“河上”，表示個是河岸上、塘滸上個意思，不是河里、水面上個意思，遞個意思垃一排方言里鄉原舊保留垃許。譬如吳語嘉定言話里“我垃黃菇塘上種著點芋艿、番芋”“老早婁塘河上條路爛透爛透”，儕是表示個是黃菇塘、婁塘河個塘滸上，保留著古漢語個用法。

個嘞，千萬覅當得鄉下老人用語不規范，塱????個言話里蘊藏著大量古漢語個信息，佷若然用普通話個眼光來看方言，會誤認為方言儕是不規范個物事，但佷忽略著，用普通話來看古漢語，有交關物事也是難以理解個，而交關方言里看似不規范個物事theh古漢語里看似難以理解個物事，實際上蠻有可能是一脈相承個。雖然現代漢語所有個方言相對古漢語來講儕有著一定個變化，但古漢語個特征原垃??各種方言里或多或少個保留垃許。當交關人為“古今差異巨大”而對古漢語大為頭痛個辰光，殊不知，古漢語gah實就活躍垃我伲個口頭，當佷用自家活生生個語言去理解塵封已久個古語，比起嘸不切身體會個死記硬背，遞個難度自然就降低著交關。

在外，用方言母語朗讀對品味古詩詞也大有好處垃許。因為現代各地方言個語音相對古漢語來講變化情況各有不同，有排特征現代個北京語音是表現不出來個。譬假講，古漢語分平聲、仄聲，分舒聲、促聲，作詩填詞個辰光根據當時個語音儕是有講究個。現代北京語音為此著入派三聲，也就是古漢語里發音短促個一類字個聲調分別并到著其他幾個聲調里鄉，促聲消失，平仄個韻律格局有所打破，個嘞塱有排詩詞里就讀不出當時辰光個腔調，譬方柳宗元個《江雪》：

千山鳥飛絕，萬徑人蹤滅。

孤舟蓑笠翁，獨釣寒江雪。

對于交關平仄、舒促格局朆打破個方言來講就有能盡可能個接近古代個腔調。南方有排方言甚至拿古漢語個四聲八調系統完整個繼承著下來，譬如吳方言區個松江、崇明、常熟、紹興嘞 thin地方，儕保留著古代個八只聲調，品讀古詩詞是再好不過個嘖。

外加，古詩詞還講究押韻。押韻個字，垃作者當時個年代韻是一樣個，但是語音變化到現在，有個方言里本來押韻個字可能變得不押韻嘖，但塱還一排方言里可能原舊押韻垃許。例如大家耳熟能詳個《詠鵝》：

鵝、鵝、鵝，曲項向天歌。白毛浮綠水，紅掌撥清波。

末腳個“鵝、歌、波”古代是押韻個，但現代個北京音阿末一個字'波’個韻母theh'鵝、歌’不一樣嘖，不押韻嘖，但現代個嘉定言話遞三個字原儕押韻垃許。還有譬如陸游個《示兒》：

死去元知萬事空，但悲不見九州同。

王師北定中原日，家祭無忘告乃翁。

韻腳是“空、同、翁”，古代當然儕是押韻個，但現代個北京音“翁”個韻母變得theh“空、同”不一樣嘖，但嘉定言話遞三個字也原儕押韻垃許。佷若然碰著用北京音讀出來不押韻個詩詞，不相用自家個方言讀讀看，講不定原舊古色古香，韻味十足垃許。

個嘞，千萬覅小看方言，雖然垃交流功能上所有個方言儕嘸能theh普通話比，但方言對古漢語個傳承功能是巨大個，有能彌補普通話個不足。

2．   對學習現代漢語個好處

對于學習現代漢語，方言也有積極作用，特別突出個表現垃區別普通話里個同音詞。為此著不同方言相對于古漢語個語音變化是不同個，個嘞有排古代讀音不同個字塱有排方言里可能讀音變得一樣嘖，但塱還一排方言里原舊像古代一樣讀音不同。利用遞種差別，我伲就可以準確個區別不同個字詞，若然我伲只懂普通話，只會北京音，個么交關字詞我伲就難以區分，就蠻容易寫錯別字。普通話里交關同音個字詞垃佷個方言母語里蠻有可能讀音不同，寔恁佷就有可能越加敏銳個體會????個差別，越加不容易寫錯脫。例如，下頭遞量組詞語塱普通話里同音，學生子蠻容易搞和脫，但通過吳語可以輕易個從語音上加以區分：

一對  一隊

走進  走近

即時  及時

報到  報道

清音  輕音

修養  休養

情節  情結

小節  小結

法制  法治

權利  權力

有利  有力

勢利  勢力

暴利  暴力

偵查  偵察

唯心  違心

品味  品位

自覺  自絕

做對  作對

形勢  形式

個別  各別

地域  地獄

界線  界限

…………

從小學堂里個教學實踐來看，交關囡肆 “做”theh“作” 、 “走進”theh“走近”嘞些兒容易搞和脫，若是????個吳語基礎好點，特別是像長輩一樣吳音讀漢字個能力不喪失個說話，遞種情況應該要好交關，因為遞量組詞語塱吳語里讀音是不同個，原像古漢語一樣“進”theh“近”清濁不同，“做”theh“作”長短不同。

若然用普通話個思維思考相關個題目吃不準個說話，完全可以用吳語讀讀看，可能就要豁然開朗個。看拼音寫詞語“弄虛作假”，有排囡肆容易寫成功“弄虛做假”，但所有方言里保留入聲調個人，只要想想看平常腳大家用方言話遞個詞是哪恁話個，一話就曉得肯定是“弄虛作假”而不會得寫成功“弄虛做假”。 還有像選詞填空“走進”theh“走近”，只要代到空格里連句子用吳語讀讀看，馬上就會清爽個。

還有一個弄得交關人儕頭大個知識點就是“的地得”個區分，之所以頭大也是因為????塱普通話里同音，即使教學生子口訣“白勺是名詞，地動山搖，得意忘形”， ????原舊稀莫弄懂垃許，豆里麥里也搞不清爽，關鍵問題還是只要語音形式一樣，人就容易搞和脫，因為語音個不同是最直觀，最具體個，相比起來，教????“'的’后頭跟名詞，'地’后頭跟動詞，'得’后頭跟形容詞”實在是忒抽象嘖。

但是，就像前頭話個伊恁，塱北京言話里同音，別個方言蠻有可能讀出來原不一樣垃許。以吳語嘉定言話為例，橫是口語里話著個發teh或者deh寔恁個音，基本肯定用雙ngae人個“得”。譬方“??阿跑得快？跑得快個哦！”“??跳得阿遠？跳得遠個哦！”，個么做題目個辰光，跑得快、跳得遠肯定是用“得”。至于帶“的地”個詞組，嘉定言話口語儕用“個”，譬假講“美麗的家園”可以翻成功“美麗個家園”，“迅速地包圍”可以翻成功“迅速個包圍”，但原可以像老人讀書看報個恁用吳音去讀原詞“美麗的家園”“迅速地包圍”，有著語音個差別，就容易分辨啥辰光用“的”，啥辰光用“地”。像我伲遞排原舊用吳音讀書看報個人，一般講來“的地得”是不會得搞和脫個，因為遞三個字垃我伲嘴里讀出來從來儕是不一樣個。

還有，方言對于理解交關同義或者類義復合詞大有好處。譬如：寬闊、狹窄、穿著、尋找、堵塞、坍塌、玩弄嘞thin，遞排儕是文雅個書面語詞，老師講課個辰光，可能一般會話“寬闊”就是“寬”個意思，“狹窄”就是“窄”個意思……仔細觀察，就會發現，每個詞個前后兩個語素可能分別塱一種方言里單獨使用。譬方普通話講“寬了些、窄了些、穿衣服、找到了、堵掉了、塌下來”，嘉定言話講“闊著眼、狹著眼、著衣裳、尋著嘖、塞脫嘖、坍下來”，普通話講“玩火、玩水、玩電腦”，嘉定言話講“弄火、弄水、弄電腦”。

日常生活中使用個詞，對于人個體會是最深刻個。對于囡肆來講，??既會普通話，又會方言母語，??就會曉得，哦，普通話用遞個單音節詞，我個方言用伊個單音節詞，原來遞個書面語詞就是遞兩個詞拼起來個，意思儕是一樣個，寔恁，??對遞種同義或者類義復合詞個理解不單完整，外加具體、生動。叛恁，??對其中一半語素個理解可能還停留垃抽象狀態。

在外，維持囡肆個方言母語，對于????聽懂或者學習現代漢語各種方言也提供著蠻大個便利。可能家長朋友對遞個不以為然，認為學其他方言只有娛樂消遣個用場，對學習嘸啥幫助垃許，但不相想想看，當囡肆出去讀大學個辰光，佷阿是會擔心??阿適應伊座城市，其中，語言肯定是一個重要個考慮因素。譬方講，一個會嘉定言話個嘉定囡，哪怕??只是聽得懂嘉定言話，個么，不管??歇兩日塱上海還是塱蘇州、無錫讀大學，??馬上或者不消幾許辰光就有能聽懂遞排城市個言話，減少著適應環境個辰光，對于??個大學生活會帶來比較大個便利，對于心境自然會有積極個影響，當然也就有利于安心學習。

二、  外語學習方面

1．   對學習日語、韓語個好處

日語、韓語嘞排周邊語言深受漢語影響，????個漢字讀音theh古漢語蜪有相當齊整個對應規律。同樣，現代漢語交關方言也theh古漢語蜪有相當齊整個對應規律。個么，自然，交關漢語方言theh日韓語蜪也有相當齊整個對應規律，遞個就是為啥交關人學日韓語個辰光會發現theh某種方言蜪有點像。譬方前頭講著個古漢語個入聲調，塱北方個晉語theh廣大個東南各大方言里儕還保留垃許，遞個theh日韓語里個相關讀音有嚴整個對應規律，塱遞排方言里讀入聲個，也就是發音短促個個類字，塱韓語里個讀音就是以p、l、k寔恁個音收尾個，塱日語里就變成功雙音節。因為入聲字塱古漢語里就是以p、t、k作為韻尾個，遞三套韻尾甚至塱粵語里還完整保留垃許，????遞個特征theh日韓語對應還要嚴整。外加，粵語嘞 thin theh古漢語一樣，鼻音韻尾也分成功前中后三套，分別是m、n、ng。韓語也保留著古漢語個m韻尾，譬方“三”讀sam，還有大家耳熟能詳個《江南style》，“南”也是以m收尾個，theh古漢語一樣。對于還有m韻尾個方言來講學韓語根本用不著死記硬背個，簡直可以講對得煞齊。在外，日語theh古漢語一樣有濁音，吳語也繼承著古漢語個濁音，兩者之間也是對應個，用不著死記硬背個。

2．   對學習歐洲語言個好處

英語、法語、德語嘞排歐洲語言，雖然theh漢語蜪嘸mae親屬關系，也不像日語、韓語個恁深受漢語影響，但是為此著人類個發音原理儕是一樣個，就是靠發音器官用各種發音方法發音，個嘞佷母語里個某些音邋別個語言里也有，寔恁，佷學習別個語言，要發遞兩個音就便當得邪氣——佷母語里本生就有好垃許。佷本來就會發個音越多，佷學外語碰著相同發音個概率就越高，個么佷學習難度降低個可能性就越大。

挨下來以英語為例。

英語里有濁音，例如big  dog good  zoo里個b、d、g、z，吳語里也有遞排濁音，如勃、特、搿、詞，個嘞吳語區個人發英語個遞排音，不單學起來便當，外加發出來到位。不像有個人話成功pik、taok、kot、su，就可能是因為方言母語里嘸不濁音，學英語個辰光還是發不出濁音，結果就導致著遞種發音不到位個現象。

英語里有長音theh短音個區別，例如sheeptheh ship ， deep theh dip。廣大個南方漢語theh北方個晉語也有長短音個區別，譬如吳語“希”theh“吸”，“題”theh“敵”。

還有，英語里有otheh ao 個區別，例如Books theh box，Looktheh lock。有個方言里也有ohtheh aoh個區別，例如吳語嘉定言話“谷”theh“角”，“綠”theh“落”。

為此著大家儕有交關共同特征，個嘞囡肆塱學習個辰光會有交關先天優勢，無論是聽音還是發音。聽說講外界評價話江浙地區個人英語比較好，作興，有相當一部分功勞儕要歸結于江浙人個母語——吳語。大家也常莊聽見話日本人講英語蠻蹩腳個，遞個可能也是因為日語里鄉有能發出來個音比較少，個嘞外語里交關音對日本人來講學起來比較困難。

除脫仔英語，學習其他個歐洲語言也有遞種情況，可能交關歡喜外語個朋友儕有過寔恁個驚喜——學法語、德語嘞thin有排音竟然塱自家個方言里也有！

綜上所述，維持囡肆個方言能力，不管是對于學習古代漢語還是現代漢語，日語、韓語還是英語、法語，儕是大有好處個。

對于學習古代漢語有益，是因為方言當中保留著交關古漢語個成分，有不少原舊活垃口頭上個古漢語，對于理解古漢語theh品讀古漢語作品有極大個幫助。

對于學習現代漢語有益，是因為各個方言相對于古漢語來講變化情況不同，繼承著個成分有所差異，從而對學習現代漢語提供著不同個維度；同時，為此著各種方言儕是從古代漢語傳下來個，個嘞相互之間有明顯個對應規律theh交關共同個成分，對于囡肆適應就學個城市也有積極作用。

對于學習日語、韓語有益，是因為日韓語theh漢語交關方言一樣繼承著交關古漢語個成分，使得兩者之間有明顯個對應規律，可以省脫交關死記硬背個功夫。

對于學習英語嘞thin歐洲語言有益，是因為人類個發音原理是相同個，外語里有排音邋佷個方言母語里場時就有，佷會個音越多，佷學外語碰著相同發音個概率就越高，佷學習外語發音個成本就越低。試想，若然漢語里也有小舌顫音，佷阿會得還為學習有排語言個遞種發音痛苦不已吶？

個嘞，勸告廣大個家長朋友，不宜扼殺囡肆個方言能力，盡讓theh????蜪話方言么嘖，營造方言母語個環境，遞種能力本來就應該是交關自然個。若然為著要講好普通話咾刻意扼殺囡肆個方言能力，不單得不償失，外加不一定達到佷想要個效果。現在普通話個語言環境是全方位個，占絕對優勢個——電視、廣播、學堂教學……可以講是用不著擔心囡肆講不來或者講不好普通話個。囡肆塱習得語言個過程當中，若然處于一種雙語個環境里，??是會自然而然分辨遞兩種言話個。但佷若然刻意個只theh??蜪講普通話，甚至喊老人也theh??蜪講普通話，個么，??不單損失著一種語言能力，外加??個普通話也不一定就好，因為佷個普通話也不一定傍老師標準，老人個普通話可能還要蹩腳。最終個結果可能只是造成著囡肆只會講普通話，外加還不一定標準，甚至只聽得懂普通話，到阿末腳可能連當適應本地個社會生活也有問題。

會兩種言話不等于兩種言話儕講不好，只會一種言話也不等于遞種言話就講得哪恁好。遞個就像寫字一樣，只會寫漢字不等于漢字就寫得幾nyian??，有個人一手怖字寫著一輩子。但有個人漢字也寫得??，外文也邪氣漂亮。遞個就像有排播音員、主持人，不單普通話標準，外加方言母語也道地、流暢，聽來邪氣適意，相信大家一定不會陌生。

個嘞，試圖靠犧牲一種言話來講好還一種言話應該講是不合算個。再講，交關家長儕主張自家個囡肆學外語，若然認為話著方言普通話會講不好個，個么，學著外語，特別是日語、韓語，阿是也會弄得普通話講不連縴吶？而且，交關家長主張學習外語個一個理由是多學一門語言對于囡肆個智力開發大有好處。個么，若然明白遞個道理，我想佷肯定也有能認識著，維持方言母語個能力，自然也對智力開發大有好處，再加上會發個音多，還可以對學習外語提供便利，豈不是一舉兩得個事體？聽說講國外做過寔恁個調查，發現總體上會兩種言話個囡肆傍只會一種言話個囡肆成績好。

雖然手頭嘸mae遞只調查個第一手資料，但我伲可以用土辦法來算一筆賬：以北京言話為基礎個普通話，有21個聲母，39個韻母，4個聲調。嘉定言話有27個聲母，45個韻母，6個聲調。如果聲調不去考慮，就用聲母、韻母數量相加個方法來看，若然囡肆從小只會普通話，??會發個音只有21+39，共總只有60個介仔，但若然??嘉定言話原會講個說話，去脫theh普通話一樣或者差不多個兩個音，保守個算，聲母方面起碼貨會多發8只音，韻母方面起碼貨會多發25只音，傍只會普通話個囡肆要多會三十幾個音，多著一半也寬著嘞！亨孛冷than加起來，既會普通話又會嘉定言話個囡肆會發個音有100個戶蕩。遞個是一筆幾許寶貴個財富啊！當然，遞種計算方法只是大約摸酌，不算科學，但可以簡單個說明問題。

可惜個是，我伲個教育從來朆教我伲語言是啥個物事，漢語是啥個物事，個嘞交關人從來朆拿自家最最本真個方言母語theh普通話、外語放垃一個平面上看，從來儕當得方言就是咦哩哇啦亂嚼一通個不標準個不上臺面個物事。乃么佷真個不曉得，語言是抽象個統稱，方言么是具體個，一種語言分成功幾種大方言，大方言里還分成功小方言，直到一個個具體個地點，大到一座城市，小到一個宅頭。不管佷話漢語、英語，還是日語、韓語，佷話出來個一定是其中個一種方言。廣州人話出來個是廣州言話，上海人話出來個是上海言話，北京人話出來個是北京言話……千千萬萬地點方言個集合，遞個統稱么叫漢語，漢語個共同語普通話是以北京言話為基礎形成個，實際上也是一種特殊個方言。共同語儕是以一種方言為基礎形成個，日語個共同語以東京言話為基礎、韓語個共同語以漢城言話為基礎。

同樣，大家熟知個英式英語、美式英語、印度英語、澳大利亞英語嘞thin也是英語個方言，倫敦人話出來個是倫敦方言，曼徹斯特人話出來個是曼徹斯特方言，紐約人話出來個是紐約方言……至于我伲學個是啥個英語吶，可能也只有能話是中式英語，也是英語遞個統稱下頭個一種變體。

個嘞，覅拿自家個方言母語不當樁事體，各種言話只是使用個范圍有大有小，使用個場合各不相同，但就語言個本質上來講，儕是一樣個。每種言話，哪怕小到只有一個宅頭個人使用，??也是有自家個一套完整個體系個，語言三大要素——語音、詞匯、語法，一樣不少。

為著便于理解，拿普通話近似個還原成北京言話，拿佷學個英語，假定??是用倫敦言話作為標準個，拿佷學個日語還原為東京言話，拿佷學個韓語還原成漢城言話，個么，以嘉定人為例，嘉定言話、北京言話、倫敦言話、東京言話、漢城言話，佷學個所有個言話儕是一種具體個方言，從語言個本質上來看儕是一樣個。

佷若是認為學北京言話、倫敦言話、東京言話、漢城言話儕有好處，個么話得維持嘉定言話個能力就嘸不好處嘖？當然，交關家長儕是從語言個適用范圍去考量個，個自然不容否認，嘉定言話個使用范圍是最狹窄個。但是，可能對于大多數個嘉定人來講人生當中大多數個辰光儕是塱故鄉生活個，即使不塱嘉定，也垃??上海地區或者長三角范圍內個。除脫仔普通話普遍通用個交流功能，嘉定言話個文化、社會適應功能可以講是其他言話儕不可比擬個，因為嘉定所處個上海地區theh蘇南、浙北講個儕是北部吳語，各個地點雖然有差異，但有共通性，有著嘉定言話個基礎，聽懂本地區其他地點方言個難度降低著交關，不管佷塱上海、嘉興還是蘇州、無錫，母語個共通性儕是佷適應伊座城市個優勢。從遞個角度上來講，嘉定言話個實用性甚至遠遠大于倫敦言話、東京言話、漢城言話嘞thin。

總數講來，維持方言能力對于囡肆個學習、工作、生活儕大有好處垃許，大家要克服輕視自家方言母語個心理，建議大家平常腳自家theh老人儕盡量theh囡肆蜪講方言母語，覅讓????喪失遞種能力。當佷看不過老人用土透土透個土言話引囡肆個辰光，佷要意識著，雖然老人可能不會外語，連當普通話也講不連縴，但幫助囡肆學習中外語言theh適應社會文化個密碼，就垃塱遞種看上去土透土透個土言話里。

希望遞篇文章有能為廣大個家長朋友帶來一點啟發。

疁·瀏河長江

2013-8-9 禮拜五 

癸巳年七月初三

朗讀：疁·瀏河長江

排版：神死慟瞑