|
講起“香山”，我角著（覺得）北京葛“香山”最有名氣，俚不單單有燕京八景之一葛“西山晴雪”，也是中國四大賞楓勝地之一；山里葛碧云寺，孫中山先生曾暫厝四年；山腰葛雙清別墅，毛澤東主席進京“趕考”前也小住過…… 講起“香山”，我還曉得太湖邊浪也有個“香山”。葛地方出匠人，北京紫禁城，天安門就是“香山幫”匠人修筑葛…… 講起“香山”，小辰光我真葛不曉沙洲（現在叫張家港）也有座香山，號稱“江南香山”  今朝總算有機會親眼目睹俚葛真容哉！從蘇州開車一路從蘇虞張公路、張家港東三環、張楊公路開嗞毛毛較（差不多）八、九十公里路，來到山腳下。 葛頂“香山”，據傳說是春秋辰光吳王夫差派遣美人到山浪來采香，所以叫“香山”。俚勒浪現在張家港保稅區金港鎮，搭長江邊浪葛長山、巫山相對，南傍東橫河，搭稷山相望。山體呈菱形狀，由大、小香山組成。北坡險峻，南坡平緩，頂部開闊，素有江南名山之譽。清朝康熙《江陰縣志》里有“香山突出平壤，高峻磅礴，甲于他山”葛贊語。  張家港葛“香山”，自然風光秀麗，人文資源豐富，加上撲朔迷離葛傳奇故事，歷來吸引嗞不少文人墨客觀光賞游:宋代大詞人蘇東坡游香山葛辰光曾經為梅花堂題匾額；明朝徐霞客更加因為就住勒附近，蠻多次登上香山，留下磁不少詩詞、賦文。俚勒嗨《游小香山梅花堂序》當中贊嘆道：“千年跡冷荒丘，一旦香生群玉，不特花香、境香、夢亦香，可謂不負此山矣！” 老底子香山有“十八景”：釣魚臺、采香徑、梅花堂、洗硯池、石虎門、圣過潭、觀音殿、荷花茶廳、圓寂塔、聽松吟、桃花澗、圣清池、毗陵井、巫山夜雨、天臺石、歸云洞、烽火墩、藏軍洞?，F在經過歲月流逝，滄桑巨變，傳說當中葛大部分景點已蕩然無存，我走馬觀花葛游覽嗞一番:  該個是釣魚亭。相傳姜子牙助周滅紂之后，遵嗞王命東游，尋覓泰伯、仲雍葛后代。途經香山葛辰光曾經勒浪北面山腳下頭江邊浪垂釣過?！督幙h志》、《風土記》儕有記載:“江陰東二十里，香山北麓有石廣一丈三尺，是姜太公釣魚之所在”。后世登人特為修筑該只亭子，以作紀念。  上頭是明香湖。為啥要叫“明香”呢？俚寓意“明風麗日奈何天，香蘭凝露蛺蝶翩”，四季景色各異，繁茂蔥蘢、層林盡染儕勒浪該搭（這兒）盡情上演。 沿山路慢慢較向上，山雖然不算高，但不過也蠻有野趣。   山頂浪有一座近年造葛塔，叫“聆風塔”。塔身飛檐翹角，金色塔剎，八面九級，是明清樓閣式江南寶塔，一眼望過去，有瓊樓玉宇之感。據介紹:登塔可聆聽八面來風，江南秀色盡收眼底。但不過塔門緊閉，嘸不辦法去證實……  相傳勒浪春秋吳楚越爭霸葛辰光，吳國為嗞防略楚國順江而下偷襲自家，勒嗨香山頂浪修筑嗞廿七個藏軍洞，儕是東西走向，洞口朝東?？拥莱世刃?，外寬內窄。洞頂浪有氣窗。A字形結構，兩邊用石塊壘砌而成，頂部用大石頭覆蓋。  該只洞是系原貌古洞，屬于省級文物保護單位。 總體來講，張家港葛“香山”雖然不好搭北京“香山”來比較，但不過俚風光旖旎，古跡眾多，粗獷而不失秀麗，雄偉而不乏典雅，撥勒譽為“江南名山”也并不過分。 原創：釣雪 語四禪公眾號 24.10.30 |
|
|
