|
父親之稱呼，喺古代喚阿爹、阿父，又或阿爺（《花木辭》阿爺無大兒，木蘭無長兄）；現代則有“爸爸”、“父親”；謙稱有“家父”、“家翁”……林林種種，舉之不窮。廣府話則自成一格，有仿古式——“阿爸”，西譯式——“爹哋”，更有人人識——“老竇（老豆）”。 “老豆”一詞嘅來歷有兩種說法。 其一為竇燕山，《三字經》有云：“竇燕山，有義方，教五子，名俱揚”。竇生乃五代后晉時期人，官至太常少卿、右諫議大夫，而最為人樂道系佢五位公子，個個皆有成就：長子竇儀中進士，成為翰林學士，曾任禮部尚書；次子竇儼中進士，又做翰林學士，曾任禮部侍郎；三子竇侃曾任補闕；四子竇偁又中進士，做授翰林學士，曾任諫議大夫；五子竇僖曾任起居郎。當時人稱竇氏五龍，一時傳為佳話。而竇燕山本人亦都活到八十三歲，壽終正寢。竇翁因教子有義方，堪稱人父之典范，故有“老竇”之尊稱。竇燕山故事符合眾人追求美好嘅愿望，且“老竇”稱呼亦對父親有一份尊敬之意。 其二則與鄉音有關。子女有時會暗稱父親做“老頭子”，簡稱“老頭”。此叫法據說最初盛行于順德、南海，之后傳至省城。“老頭”以順德話讀，近似“老豆”，此發音遂漸成為通用省城話。由于“老頭子”、“老頭”并非廣東話特有，而且聽落似乎對父親稍欠尊重，故此呢一說法不及“竇燕山”一說。 華夏數千年父系社會，男性處主導地位，子孫后代一律跟隨父姓。語言承載文化，于是乎廣府話亦有俗語“老竇姓乜都唔知”，卻冇“阿媽姓乜都唔知”，而只有“阿媽都唔認得”。事關老竇與你姓氏相同，若太過沉迷于某事物，就會連自己老竇姓乜都唔記得，亦即等于唔記得埋自己個名，達到“忘我”境界！ 講開跟老竇姓，不能不提粵劇泰斗馬師僧代表作《苦鳳鶯憐》里頭《余俠魂訴情》嘅經典唱段：“我姓（呀……）余，我個老竇佢又系姓（呀……）余，俠魂就系我個名字。我家中內，糧無隔宿，幾乎要做到乞兒……”《苦》劇大意講述女主角被人冤枉通姦，最后得窮困潦倒嘅男主角余俠魂相助，恢復清白，大團圓結局。男主角一出場就唱“我姓余，我個老竇佢又系姓余”，正正為強調“我系有名有姓嘅，唔系連自己老竇系邊個都唔知嘅私生子，亦唔系要跟后父姓嘅‘游艇仔’”。呢句唱詞，確系頂天立地，有尊嚴兼有骨氣。 舊時，老竇地位何等尊貴，一家之主，一言九鼎，嚴父出孝子。而家，卻有“廿四孝老竇”，坊間更有人笑說：而家莫講話“在家從父”，仔女對老竇唔好一言九“頂”經已算好喇。做老竇嘅亦唔在乎“牛耕田，馬食谷，老竇賺錢仔享福”抑或“老竇養仔仔養仔”，只要仔女記得老竇姓乜就經已心足......世界變咯！ |
|
|
