|
江南是水做個。  每當提起江南，眼門前就蘊起一道煙水，迷迷蒙蒙，慢慢叫行來一只小船，穿過弗高個石洞門，蕩進煙霧里。 小橋流水，煙水迷離，確實，江南搭水總歸相依相伴個。 江南地區河道縱橫，水網密布，而倚水而居個江南人也就因水結緣哉，住個是臨水居，行個是水上船，唱個是水磨腔，吃個是水中仙。 藕，茭白，菱，雞頭米，荸薺，慈姑，莼菜，水芹，該個八只水生植物，味道清鮮，色澤清麗，如仙人之姿，撥挑剔個江南人奉為水中八仙，貫穿四季食單。 所謂“春季荸薺夏時藕，秋末茨菇冬芹菜，三到十月茭白鮮，水生四季有蔬菜。”講個就是該八樣食鮮。 春 有莼菜  莼菜是國家一級保護植物當中惟一個常用食材。宋朝辰光，就搭花石綱，絲綢綾羅同屬貢品。 而早勒海西晉年間，就有吳中名士張季鷹因思念莼菜鱸魚美而棄官歸鄉個軼事。后世詩人經常提起個“莼鱸之思”就源出于此。 莼菜本身無不味道，葉爿浪有一層賽過瓊脂個黏液，大多用來汆湯。落湯以后個口感鮮滑，如魚髓蟹脂，賽過絲綢滑過斛嚨，難用言語描摹。 秋 品茭白  茭白古稱菰菜，是引得張翰辭官個另外一只時鮮。 蘇州人一年四季弗斷茭，但不過最好個茭白還是勒海早秋時節。相傳蘇州城東個葑門就因茭白而得名，可見吳人對茭白個執著。 茭白吃口甘潔，清而有韻，實勒吃法多樣，可葷可素，大多切絲削片，入火慢燒。 蘇幫菜里有油悶茭白、蝦籽茭白等經典菜式，民間也有茭白炒蛋、茭白炒毛豆子、茭白燒肉等簡齋吃法。 新秋 有菱角  秋來鮮品當屬菱，根據外形弗同，還可以分出和尚菱、餛飩菱、刺菱等等，當中的佼佼者就是紅菱哉。 紅菱大多春栽秋收，吳歌里就有唱著：“桃花紅來楊柳青，清水塘里栽紅菱。姐栽紅菱郎栽藕，紅菱牽到藕絲根?！?/p> 紅菱顏色顯，討人歡喜，名字也好聽。生得早個是水紅菱，稍微晏點大一廓個叫雁來紅，青亨亨個叫鶯哥青。 鮮鮮個紅菱可以當水果生吃，味道爽脆甘潔，水拖拖，甜津津，瀴凍凍，舌尖像煞能摸著水個靈魂。 新秋 有塘藕  新秋里菱個最佳搭檔就是藕哉，白藕紅菱鑲碧荷，來得個好看。 蘇州個塘藕勒海唐朝辰光，就已經是貢品哉。藕大多有七孔，賽過七竅玲瓏心，而蘇州個塘藕為人稱奇個是有九竅，食而無滓。若是單節九竅，就更是佳中上品哉。 鮮藕切片好當水果吃，放勒小碟子里，用牙簽細細叫挑仔吃，賽過冰盤雪藕，能得藕之真味。 也可以切絲清炒，或者刨細和肉，做藕圓。蘇州人還歡喜拿糯米塞勒藕孔里，加糖蒸熟，稱焐熟藕，也就是現在弗少人講個“糖藕”。 中秋 雞頭米  雞頭米學名芡實，因結實形似雞頭而得名。芡實性暖，可以入藥，有益精氣、利耳目、止煩渴、除虛熱等功效，是一味名貴個食材。 蘇州南塘雞頭米是南芡里個佳品，雞頭滴圓光滑，弗像“北芡”渾身有刺，撥開來個米粒也晶瑩玉白，吃口軟韌。 每年農歷八月半，雞頭米正當時，蘇州人個傳統吃法也相當個清爽，清水加糖桂花就好。 范煙橋贊俚：“銀毆浮玉、碧浪沉珠，微度清香，雅有甜味，固天堂間絕妙食品也。” 臘月 掘荸薺  臘月里，吃荸薺。 荸薺，因形似真人個肚皮眼而得名，也有寫作“荸臍”個。蘇州是全國四大荸薺產地之一，特別是蘇州城東車坊鎮個荸薺，形大而色黑，清朝末年北京城里還有“天津鴨兒梨不敵蘇州大荸薺”個說法。 荸薺生吃，味道清冽甘甜，清熱生津。但不過荸薺好吃皮難削，實勒，老法頭還專門有人做“扦光荸薺”個生意。 荸薺也能燒熟仔吃，蘇州人吃年夜飯個辰光還會得拿熟荸薺鑲勒飯里，稱元寶飯，啥人掘著元寶，開年就會得福財兩旺。 越冬 嘗水芹  水芹，亦叫水英，勒海古人眼睛門里還是文雅個象征，《詩經》就有“思樂泮水，薄采其芹”個說法，后世弗少人就稱讀書人為“采芹人”。 北方種個大都數是旱芹，而伲江南地區個水芹一般只有葉爿顯綠，桿桿頭細圓中空，黃白顏色，稱“白頭”，“白頭”亦長，品質亦好。 水芹嫩頭要到深秋再采，一腳好吃到開春，是“堵冬缺”個品種。 水芹個味道鮮嫩，爆炒以后有一種獨特個清香，吃法有二：一炒、兩拌。可以切香豆腐干、肉絲翻炒，也可以加麻油冷拌，清鮮爽口。 冬春 見慈姑  慈姑，一歲根生十二子，如慈姑之乳眾子，故名。慈姑開花雪白，賽過玉蝶翩飛，老法頭有弗少歌詠慈姑花個佳句。 蘇州種植慈姑的歷史相當個長，有一種改良品種叫“蘇州黃”，皮黃肉白，吃口香糯細膩，外加入口苦味少而淡，澀味輕，但不過燒個辰光還是要先去澀。 蘇州人吃慈姑大多搭葷菜，譬方說慈姑燒肉、慈姑炒雞片、慈姑燒蹄髈湯等等。 另外還有一種小吃“慈姑片”，拿慈姑切成薄片放勒油里氽，氽好個慈姑片搭薯片差仿弗多，吃口爽脆，是每一個蘇州小囡個童年零食記憶。 水里八仙，味出八鮮，該個是水撥江南個饋贈，也是江南清淡飲食個根基。  文 | 予安 版 | 予安 圖片參考《植物名實圖考》 |
|
|
